Xwendekarên Efrînê: Em ê li hember astengiyan biserkevin

Bi hezaran xwendekarên Efrînê ji bo xwendina xwe bibin serî, di duyemîn sal a li kantona Şehba û navçeya Şîrewa de, berê xwe didin avahiyên niştecîbûnê yên ku wek dibistanan hatine amadekirin. Xwendekaran îsrar dikin ku ji bo temamkirina xwendina xwe, li hemberî hemû astengiyan serbikevin.

Xwendekarên kantona Efrînê, li dûrî warên xwe pêşwaziya duyemîn sala xwendinê kirin. Xwendekaran ji ber êrîşa artêşa Tirk a dagirker û çeteyên wê, berê xwe dane kantona Şehbayê. Dibistan di êrîşên leşker û çeteyên Tirkiyê de hatin rûxandin û ji xwe re kirin baregehên leşkerî.

1450  xwendekar asta seretayî di 11 dibistanên Şêrewa de hatine wergirtin. Hin ji wan li kampa Şehba û kampa El-Ewde, ne. 200 xwendekarên asta navîn jî li 3 dibistanan dixwîn in. Herwiha di du dibistanên asta amadeyî de jî 70 xwendekar dixwîn in.

Nûçegihanê ajansa me berê xwe da dibistanên Şêrewa û nerîna xwendekaran girt. Xwendekarê bi navê Husên Husên jî yek ji xwendekarên refa pêncan di dibistana Şehîd Şoreş Rojava ya gundê Dêrcemal a ser bi navçeya Şêrewa de dixwîne. Husên wiha got:`` Ji ber êrîşa çeteyan a ser dibistanên me û derketina me ji bajarê Efrînê, me nikarî xwendina xwe temam bikin. Lê her çiqas artêşa Tirk a dagirker û çeteyên wê dibistanên me xirabe kirîn jî, em dest ji hînbûn û fêrbûna xwe bernadin.``

Husên destnîşan kir ku xwendekarên Efrînê tu carî dest ji ziman, xwendin û dibistanên xwe bernadin.

Xwendekara refa dehan a dibistana Şehîd Dîdar a navçeya Şêrewa, Roşîn Miqdad jî wiha got:`` Em xwendina dikin û em ê li ser vê yekê jî dewam bikin. Ev yek ji bo dagirkeriya Tirk wek nameyekê ye û naveroka wê ew e ku tevî topbarana li ser gundên me, em ê nehêlin ew bigihîn armanca xwe. Em ê bi xwendinê dagirkeriyê ji Efrînê derbixin.``

Xwendekara bi navê Sîmav Kose jî got:`` Zimanê me pênaseya çanda me û bingeha hebûna me ye. Artêşa Tirk a dagirker û çeteyên wê bi topbarankirina dibistanên Efrînê armanc kir ku hebûna me îmha bike û xwendina bi zimanê Tirkî di dibistanên Efrînê de ferz bike. Çete siyaseta xwe ya topbarankirina gundên Şêrewa berdewam dikin, lê em tu carî dest ji wê bernadin.``

Ji rêveberên dibistanên Şêrewa Awaz Hesen jî ev tişt got:`` Tevî ku gund û navçeya Şêrewa tên tobarankirin jî, lê zaroyên Efrînê bi îsrar û berxwedana xwe karîbûn li hemberî tevahiya astengiyan serbikevin û bi vebûna deriyên dibistanên navçeya Şêrewa, xwendina xwe bi zimanê dayikê dewam dikin.``

Li gorî rêveberiya dibistanên navçeya Şêrewa, cihê xwendinê avahiyên nişteciyê ne, ew wek dibistanan hatine amadekirin da ku tevahiya xwendekaran tê de bixwîn in. Herwiha pêdiviyên xwendinê û qirtasiyên dibistanan jî pir kêm in.

(bm)

AHNA


Mijarên Din