Zaroka 13 salî bi 5 zimanan distire

Li Şehbayê zaroka bi navê Mufîde Hemdî ya 13 salî, tevî zimanê dayîkê (Kurdî) bi Erebî, Hindî, Farisî û Sûryanî distire.

Ji bo parastina çanda civakê û kevneşopiyên xwe zarokên Efrînê ruxmî şertên û mercên jiyana di nava kampan de behreyên xwe pêş dixin.  

Yek ji van zarokan jî zaroka bi navê Mufîde Hemdî ye. Mufîde tevî hevalên xwe beşdarî çalakiyên sitrîna stranan û govendên Kevana Zêrîn dibe.

Zaroka bi navê Mufîde Hemdî 13 saliye. Ji gundê Husê (Mîrkan) ê girêdayî navçeya Mabatayê ya kantona Efrînê ye. Mufîde li rex xwendinê, di Navenda Çand û Hunerê de fêrî muzîkê dibe. Li gel temenê xwe yê biçûk pêşxistina xwe didomîne.

Ruxmî zehmetiyên jiyanê ku nikarin amûrên muzîkê yên pêşketî peyda bikin, Mufîde bi teşwîqkirina malbata xwe, bênavber behreya xwe yên di sitrîna stranan de, berdewam dike.

Mufîde ji 7 saliya xwe ve û heta niha guhdarî stranên Hindî û Farisî dike, werger dike û bi dengê xwe yê zîs distire.

Mufîde dibêje: “Ez ji biçûkahiya xwe ve stranan û strangotinê hezdikim. Bi teşwîqa malbata min tevî hevalên min li Navenda Çand û Hunerê fêrî vegotina stranan bûm. Piştî derketina me ji Efrînê min stranek li ser Efrînê hûnand."

Girêdayî zanîna wê zimanên Hindî û Farisî Mufîde got: "Bi rêya guhdarkirina stranên Hindî û wergerandina wan da ku wateya stranê bizanibim, ez fêrî zimanê Hindî bûm. Min peyvên stranan hemû dinivîsandin. Lê mixabin lênûskên min hemû li Efrînê man."

Mufîde wiha domand: "Ez li Navenda Çand û Hunerê perwerdeyên li ser stran û xêzkirinê dibim. Em li şahî û boneyên taybet ên zarokan û cejnan distirên."

Endama rêveber a Tevgera Çand û Hunerê Nehda Xelîl got: "Bi rêya pêşkêşkirina perwerdeyan di tevahiya beşan de em alîkariya zarokan dikin da ku behreyên xwe pêş bixin."

(şx/bm)

ANHA


Mijarên Din