Li Çilaxayê daxwaza çêkirina rê dikin

Li Çilaxayê û gundewarên wê di baranê de ji bo şêniyan zehmet e ku biçin û werin. Rê xirabe ne, çal û kort tijî av dibin û bandorê li tevgera şêniyan dike.

Şaredariya Gel a Çilaxayê nikare pirsgirêka rê çareser bike. Piştî ku sazî entegreyî hikumeta veguhêz a Sûriyeyê bûn budçeya wê têre nekir ku rêyan sererast bike. Şaredariya Çilaxayê bi tenê rêya giştî ya bajêr zift kir û li gundê Şibik şebekeya kanalîzasyonê bi dirêjahiya 400 metre danî.

Her wiha li Çilaxayê miqdara ziftê jî kêm e û têre nake ku rêyên Çilaxayê û gundewarên wê zift bikin.

ŞÊNÎ DAXWAZA ÇARESERIYÊ DIKIN

Hisên Ebas Ekaş daxwaz ji aliyên têkildar û şaredariyê kir ku pirsgirêkê zû çareser bikin û got bila hikumet budçeya Şaredariya Çilaxayê û miqdara madeya ziftê zêde bike da ku ew pirsgirêka xwe çareser bikin.

Her wiha Ekaş anî ziman ku pêdivî pê heye rêyên di navbera taxan û yên nêzî dibistanan de zû sererast bikin.

Ajoker Ehmed Mihemed jî got: "Di baranê de ji ber çal û kortan em nikarin tev bigerin. Gelekî ziyanê dide siwareyan. Êdî em nikarin rehet biçin û werin. Bi taybet dema baran dibare kesek nikare tev bigere."

(np)

ANHA