Rûspiyên eşîra Tey: Komên li Hesekê fitneyê dikin ne girêdayî eşîrên erebî ne

Ji herêma Dêrikê rûspiyên eşîra Tey ji ANHA`yê re axivîn û bang li Ereb û Kurdan kir ku li hember planên li dijî herêmê dest bidin hev û têkiliyên xwe yên civakî ji fitne û provokasyonan biparêzin. 

Rûspiyê eşîra Tey û rêveberê giştî yê Meclisa Rûsipiyan a herêma rojhilat Hewas Cidêi got li Hesekê bi navê eşîran wêraniyê dikin û wiha pê de çû: "Eşîrên Erebî xwedî esil û dîrokeke kevnar in, ew fitnê û wêraniyê nakin. Li pey bûyerên li Hesekê diqewimin 3 alî hene; şaneyên DAIŞ’ê, hin berpirsên ji hikumetê û dewleta Tirk. Ev alî bi navê eşîrên Ereban hewl didin fitneyê têxin di navbera gelê Ereb û Kurd. Ew li ser hesabê xwîna pêkhateya Kurd, Suryan, Ereb, Ermen, Aşûrî û Keldan dixwazin berjewendiyên xwe biparêzin."

Cidêi got ên li kolanan bang li eşîran dikin tu têkiliya wan bi eşîran re nîn e û wiha lê zêde kir: "Ew komên bi hêzên derve ve û şaneyan ve girêdayî ne. Ez bang li eşîrên Ereb û Kurdan dikim ku li dijî van pîlansaziyan dest bidin hevdû. Ez ji eşîrên Ereban daxwaz dikim ku rê nedin tevlîheviyê û zimanê nefretê nedin bikaranîn. Zimanê nefretê ziyanê dide aştiya civakî. Divê em têkiliyên xwe yên dîrokî û parêzgeha xwe biparêz in. Dijmin hewl dide ku şer li herêmê dest pê bike, têkiliya di navbera gelan de xira bike. Ez bawerim xelkê herêmê nayê van provokasyonan û ziyanê nade herêma xwe."

Her wiha endamê Meclisa Rûspiyan a Herêma Dêrikê Ebdulcebar Tey jî ev mijar nirxand û got: "Têkiliya civakî ya pêkhateyên herêmê kevnar e. Gelê Kurd û Ereb ev bi sala ne bi hev re dijîn. Destên gemarî hene, hewl didin tevliheviyê derxin û têkiliya me bi hev re xirab bibe. Em bi hev re dixebitin û dijîn. Li herêma me aramî û aştiya civakî heye ji ber vê yekê hewl didin ku vê yekê xira bikin. Ji dîrokê ve têkiliyên me yên civakî û malbatî hene. Em munasebetên xwe bi hev re parve dikin. Erkê me ye ku em vê têkilî û hevgirtina xwe ya civakî biparêzin û rê nedin ku li herêma fitneyê bikin û tevlihevî çêbe."

(np)

ANHA