Saziya Xizmeta Pêşxistina Jinan li Hesekê hat vekirin

Saziya Xizmeta Pêşxistina Jinan 22`yê Tebaxê 2026`an hatiye vekirin û lîsansa xwe li ser asta hemû bajarên Sûriyeyê wergirtiye. 

Cîgira rêvebera saziyê Lemyai Hentûş ji ANHA`yê re axivî.

Lemyai Hentûş anî ziman ku dê bi rêya xebatên saziyê pirsgirêkên civakî çareser bikin, di aliyê civakî û piskolojîk de alîkariyê bidin jinan, dewreyên perwerdê vekin da ku jin bikarin ji xwe re projeyên aborî vekin û destekê bidin projeyên biçûk û navîn ên aborî.

Di berdewamiya axaftina xwe de Lemyai Hentûş got: "Ji bo pirsgirêk çareser bibin û mafên komên bê parastin, biparêzin em qanûnî dixebitin û dibin alîkar. Bernameyên me yên perwerde jî ne tenê ji bo jina ne, hemû ferdên civakê dikarin tev li perwerde bibin."

Sazî ji komîteya bawermendan ku 7 endam in, komîteya lihevkirinê û nivîsgeha qanûnî pêk tê. Her wiha sazî dewreyên perwerdeya pîşeyî wekî dirûn, komputer, kiwafêrtî û tenduristî (destwerdana yekemîn) vedike. Di dawiya perwerdeyê de jî bawernameyên Wezareta Kar û Barên Civakî û Kar derxistine didin kesên tev li perwerde bûne.

Lemyai Hentûş da zanîn ku wan heyanî 3`ê salan peyman bi nexweşxaneya El Xabûr re çêkiriye da ku nexweşên sazî rêdike nexweşxanê pêşwazî bike û got her meh hejmara nexweşan digihêje 300 kesî.

Li gorî peymana di navbera saziyê û Nexweşxaneya El Xabûr de dê ji sedî 50 pere ji nexweşan wergire û bi vî awayî barê nexweşan gelekî sivik dibe.

Di aliyê civakî de jî sazî ji bo jinan semîner li ser têkoşîna li dijî tundiya li ser jinan, xwe ji medyaya dijîtal parastin û şerê taybet, tê organîzekirin.

Di dawiyê de Lemyai Hentûş anî ziman ku sazî hewl dide dewreyên fêrbûyîna hemû zimanan veke û pêdiviyên civakê pêk bîne.

(np)

ANHA